५ चैत्र ,काठमाडौं, । निर्वाचन आयोगले गत फागुन २१ गते सम्पन्न प्रतिनिधिसभा सदस्य निर्वाचनको अन्तिम मत परिणामसहितको विस्तृत प्रतिवेदन राष्ट्रपतिसमक्ष पेस गरेको छ। आयोगका कार्यवाहक प्रमुख आयुक्त रामप्रसाद भण्डारीको नेतृत्वमा आयुक्तसहितको टोलीले आज बिहीबार शीतल निवास पुगेर राष्ट्रपति रामचन्द्र पौडेलसमक्ष उक्त प्रतिवेदन बुझाएको हो।
प्रतिवेदन बुझ्दै राष्ट्रपति पौडेलले निर्वाचनलाई निष्पक्ष, पारदर्शी तथा भयरहित वातावरणमा सम्पन्न गराएको भन्दै निर्वाचन आयोगप्रति धन्यवाद व्यक्त गरेका छन्। उनले लोकतान्त्रिक प्रक्रियालाई सुदृढ बनाउन आयोगको भूमिकाको प्रशंसा गर्दै आगामी संवैधानिक प्रक्रियालाई समयमै अघि बढाउन आवश्यक पहल गर्न सम्बद्ध निकायलाई संकेत दिएका छन्।
निर्वाचन आयोगका अनुसार देशभर शान्तिपूर्ण रूपमा सम्पन्न निर्वाचनमा मतदाताको उल्लेखनीय सहभागिता रहेको थियो। प्रतिवेदनमा निर्वाचनको सम्पूर्ण प्रक्रिया, मतपरिणाम, व्यवस्थापकीय पक्ष तथा समग्र मूल्याङ्कन समेटिएको जनाइएको छ।
राष्ट्रपतिसमक्ष प्रतिवेदन पेस भएसँगै अब नयाँ सरकार गठनका लागि संवैधानिक प्रक्रिया अघि बढ्ने भएको छ। संविधानअनुसार प्रतिनिधिसभाको अधिवेशन आह्वान, दलहरूबीच बहुमतको दाबी तथा सरकार गठनका औपचारिक चरणहरू सुरु हुनेछन्।
यसपटकको निर्वाचनमा राष्ट्रिय स्वतन्त्र पार्टीले प्रत्यक्ष र समानुपातिक गरि १८२ सिट प्राप्त गरि करिब दुईतिहाइ बहुमतसहित उल्लेखनीय सफलता हासिल गरेको छ। सोही आधारमा उक्त दलले चाँडै सरकार गठन गर्ने देखिएको छ।
