२१ पौष ,काठमाडौं — नेपाल खुला विश्वविद्यालयले आगामी माघ ११ गते पहिलो पटक ऐतिहासिक दीक्षान्त समारोह आयोजना गर्ने भएको छ। दीक्षान्त समारोहमार्फत स्नातक, स्नातकोत्तर, एमफिल तथा विद्यावारिधि (पिएचडी) तहका गरी करिब ६५० जना भन्दा बढी विद्यार्थी दीक्षित हुने विश्वविद्यालयले जनाएको छ।
संघीय खुला विश्वविद्यालय ऐन २०७३ बमोजिम २०७४ सालमा स्थापना भएको नेपाल खुला विश्वविद्यालयले “घरमै बसेर विश्वविद्यालयको डिग्री” हासिल गर्न सकिने अवधारणालाई व्यवहारमा उतार्दै आएको छ। विश्वविद्यालयले व्यवस्थापन, कानुन, विज्ञान तथा प्रविधि लगायतका संकायहरूमा अध्यापन गराउँदै आएको छ, जसले काम गर्दै अध्ययन गर्न चाहने विद्यार्थीका लागि अवसर सिर्जना गरेको छ।
विश्वविद्यालयकी उपकुलपति प्रा. डा. शीलु मानन्धर बज्राचार्यले पहिलो पटक दीक्षान्त समारोह आयोजना गर्न लागिएकोमा खुसी व्यक्त गर्दै यसले खुला विश्वविद्यालयको शैक्षिक यात्रामा नयाँ अध्याय थप्ने बताइन्। उनका अनुसार, काम र अध्ययनलाई सँगसँगै अघि बढाउन चाहने नागरिकका लागि खुला विश्वविद्यालय प्रभावकारी माध्यम बनेको छ।
विज्ञान, स्वास्थ्य तथा प्रविधि संकायका डिन तथा दीक्षान्त समारोह तयारी समितिका संयोजक डा. सुरेन्द्र श्रेष्ठले कार्यक्रमको सम्पूर्ण तयारी पूरा भइसकेको जानकारी दिए। दीक्षान्त समारोहलाई व्यवस्थित र गरिमामय बनाउने तयारी भइरहेको उनको भनाइ छ।
कुलपति पदमा शिक्षा मन्त्री रहने व्यवस्था रहेको खुला विश्वविद्यालयमा हालै बाबुराम भुलले व्यवस्थापन संकायमा विद्यावारिधि उपाधि हासिल गरेका छन्। उनी नेपाल खुला विश्वविद्यालयबाट पिएचडी उपाधि प्राप्त गर्ने पहिलो शोधार्थी बनेका छन्, जसलाई विश्वविद्यालयको महत्वपूर्ण उपलब्धिका रूपमा हेरिएको छ।
पहिलो दीक्षान्त समारोहसँगै नेपाल खुला विश्वविद्यालयले वैकल्पिक र समावेशी उच्च शिक्षाको यात्रामा आफूलाई थप सुदृढ बनाउने अपेक्षा गरिएको छ।
