२१ पौष ,धनकुटा —नेकपा (एमाले) धनकुटा जिल्ला कमिटीले आसन्न फागुन २१ गते हुने प्रतिनिधिसभा सदस्य निर्वाचनका लागि केन्द्रीय कमिटी सदस्य तथा पूर्वमन्त्री राजेन्द्रकुमार राईलाई एकल उम्मेदवारका रूपमा सर्वसम्मत सिफारिस गरेको छ। हिजो पौष २० गते बसेको नेकपा (एमाले )धनकुटा जिल्ला कमिटीको विस्तारित बैठकले यो निर्णय गरेको हो।
बैठकको निर्णयसँगै पार्टीभित्र एकता, स्पष्टता र अनुशासनको सन्देश प्रवाह भएको बताइएको छ। यस निर्णयले संगठनलाई थप सशक्त बनाउँदै निर्वाचन तयारीलाई प्रभावकारी ढंगले अघि बढाउन मद्दत पुगेको नेताहरूको धारणा छ।
नेकपा (एमाले )कोशी प्रदेश कमिटी सदस्य खण्डमान राईले धनकुटा जिल्ला कमिटीको सर्वसम्मत निर्णयले पार्टी पंक्तिमा सकारात्मक सन्देश सञ्चार भएको प्रतिक्रिया दिएका छन् । “एकल उम्मेदवारको सिफारिसले कार्यकर्ता र नेतृत्वबीचको विश्वास मजबुत हुनको साथै पार्टी पंक्तिमा सकारात्मक सन्देश सञ्चार भएको छ,” उनले बताए।
एमाले धनकुटाले स्थानीय संगठनलाई परिचालन गर्दै निर्वाचन केन्द्रित गतिविधि तीव्र बनाउने तयारीसमेत गरेको छ। पार्टीले आगामी दिनमा जनसम्पर्क, संगठन विस्तार र चुनावी अभियानलाई सशक्त बनाउँदै लैजाने जनाएको छ।
