आजदेखि फागुन १८ सम्म चुनावी प्रचार–प्रसार गर्न पाउने

४ फागुन , काठमाण्डौ ।  निर्वाचन आयोगले आजदेखि राजनीतिक दल, तिनका उम्मेदवार तथा सरोकारवालालाई निर्वाचनसम्बन्धी प्रचार–प्रसार गर्न अनुमति दिएको जनाएको छ। आयोगका अनुसार जुलुस, आमसभा, कोणसभा आयोजना गर्न तथा अनलाइन र पत्रपत्रिकामार्फत निर्वाचन सामग्री प्रकाशन वा प्रसारण गर्न सकिनेछ।

आयोगले प्रचार–प्रसारका क्रममा निर्वाचन आचारसंहिता पूर्ण रूपमा पालना गर्न सबै दल र उम्मेदवारलाई निर्देशन समेत  दिएको छ। आचारसंहिताविपरीत गतिविधि भएमा कानुनअनुसार कारबाही गरिने आयोगको भनाइ  छ।

आगामी फागुन २१ गते हुने प्रतिनिधि सभा सदस्य निर्वाचनका लागि फागुन १८ गते राति १२ बजे सम्म मात्र यस प्रकारको प्रचार–प्रसार गर्न पाइने आयोगले स्पष्ट पारेको छ। निर्धारित समयसीमापछि कुनै पनि प्रकारको चुनावी प्रचार–प्रसार गर्न नपाइने बताइएको छ।