२३ पौष ,काठमाडौं - नेपाली कांग्रेसको विशेष महाधिवेशन सञ्चार तथा प्रचार–प्रसार समितिले काठमाडौंको बानेश्वरमा पत्रकार सम्मेलन गर्दै यही पौष २७ र २८ गते विशेष महाधिवेशन आयोजना गर्न पार्टी आह्वान गरेको छ।
नियमित महाधिवेशन समयमै सम्पन्न हुन नसकेर प्रभावित भइसकेको अवस्थामा अब विशेष महाधिवेशनतर्फ जानु अपरिहार्य भएको उनीहरुको दाबी छ। उनीहरुले आज बानेश्वरमा आयोजित पत्रकार सम्मेलनमार्फत उक्त धारणा सार्वजनिक गरेका हुन्।
असन्तुष्ट पक्षका नेताहरूले पार्टीभित्र बढ्दो आन्तरिक असमझदारी र संगठनात्मक अन्योललाई समाधान गर्न विशेष महाधिवेशन नै उपयुक्त विकल्प भएको बताए। उनीहरूको भनाइमा ढिलाइले पार्टीलाई थप कमजोर बनाउने खतरा छ।
यता पार्टीको संस्थापन पक्षले भने निर्वाचन नजिकिँदै गएको अवस्थामा महाधिवेशन गर्न नसकिने जिकिर गरेको छ। संस्थापन पक्षले विशेष महाधिवेशन पक्षको हालको माग व्यवहारिक नभएको प्रतिक्रिया दिएको छ।
असन्तुष्ट पक्षले पत्रकार सम्मेलन गरेर आफ्नो असन्तोष सार्वजनिक गरेपछि पार्टीभित्रको आन्तरिक विवाद थप सतहमा आएको छ।
